قدرت کا قانون

قدرت کا قانون

ابرار نے واضع الفاظ میں اپنی بیوی کو بتا دیا تھا

ہم کسی صورت امان کے ساتھ اس کے گھر میں شفٹ نہیں ہو نگے۔ اگر والدین جانا چاہتے ہیں تو بےشک جائیں۔  

بھابھی کو والدین سے بہت فائدہ ملتا تھا۔ سسر کی پنشن تھی اور ساس گھر چلاتی تھی۔ وہ امان سے بھی خرچہ لیتی رہتی، اس لیے بھابھی کو گھر کے خرچے کا سکون تھا۔ وہ ہر حال میں ساس اور سسر کو ساتھ رکھنا چاہتی تھی۔ سسر تو اس کی چالیں خوب سمجھتا تھا مگر ساس بھولی تھی۔ وہ بہو کی میٹھی باتوں میں آتی رہتی۔ وہ اسے بہت اچھا سمجھتی تھی اور ہر وقت اس کی تعریفیں کرتی رہتی۔ ابرار کی بیوی، امان کی بیوی کی جھوٹی باتیں لگا کر بتاتی اسی لیے وہ اس سے بدزن رہتی۔ یہ سب امان بھی دیکھتا رہا تھا اسی لیے وہ بھی اپنی بیوی کی ایک نہ سنتا اور اس کی بات بے بات پر بےعزتی  کرتا رہتا۔

امان کی بیوی کو خدشہ تھا کہ کہیں امان اپنے ماں باپ کو منا کر نہ لے جائے۔ اس نے ساس کے سامنے جھوٹے آنسو بہا بہا کر انہیں جانے سے روکنے کی کوششیں پہلے ہی شروع کردیں، 

میں آپ کے بغیر ایک منٹ نہیں رہ سکتی۔ میں ماں کے بغیر رہ سکتی ہوں مگر آپ کے بغیر نہیں۔  

ماں جو پہلے امان کے نئے گھر جانے کا نیم ارادہ رکھتی تھی، وہ بھی کینسل کر دیا اور پیار سے اسے گلے لگا کر بولی

میں بہت خوش قسمت ہوں جو تجھ جیسی بہو ملی۔

بھا بھی نے روزانہ شام کو ساس کی ٹانگیں دبانا شروع کر دیں۔ وہ روزانہ رات کو آتی اور میاں کے کہنے پر بھی ناغہ نہ کرتی۔ ابرار اس بات پر اس سے کافی خوش تھا کہ یہ میری ماں کی خدمت کرتی ہے۔ ساس یہ بات فخر سے سب کو بتاتی کہ مجھے ایسی بہو ملی ہے جو میری بہت خدمت کرتی ہے۔ ساس بوڑھی تھی اور اس کی یاداشت بھی کم ہوتی جارہی تھی، اس لیے بھابھی روزانہ جاتی، ایک تو اسے یاد کراتی کہ میں بہت خدمت گزار ہوں اور دوسرے امان کی بیوی کی خوب برائیاں کرتی۔

امان اب نئے گھر میں سیٹ ہونے لگا تھا۔ بھابھی نعیمہ اب اکثر آنے لگی تھی۔

امان کے والد کو ابرار کے بیوی کے آنے جانے کا پتہ چلا تو وہ سمجھ گیا کہ وہ انہیں خوش نہ رہنے دے گی۔ وہ دیکھتا رہتا تھا کہ وہ روزانہ اس کی بیوی سے کھسر پھسر کرتی رہتی۔ باپ نے اپنی بیوی کو ابرار کی بیوی کے بارے میں کئی بار سمجھانے کی کوشش کی

  تم نعیمہ کی باتوں کا یقین نہ کیا کرو وہ لگائی بجائی کرتی ہے۔ 

امان کی بیوی بہت اچھی ہے صرف اسے باتیں بنانا نہیں آتی مگر بھولی بیوی نہ مانتی ۔ 

وہ اب بھی کبھی اکیلے میں امان کو یاد کرتی اور روتی۔ باپ نے سوچا امان ماں باپ سے دور رہ کر پریشان ہو گا، اسے سمجھا دوں اور اس پر حقیقت بھی واضع کر دوں۔   ایک دن وہ امان کے گھر آنے سے کچھ پہلے اس کے گھر چلا گیا۔

امان کی بیوی سسر کو دیکھ کر حیران رہ گئی پھر جب شفقت سے سر پر ہاتھ رکھا تو ناراضگی بھول کر خوش ہوگئی اور انہیں گلہ کرنے لگی

  آپ نے تو ہمیں اپنے گھر سے نکال دیا اور ہمارے ساتھ رہنے بھی نہ آئے۔

امان کے والد مسکرا دیے۔ اتنے میں امان گھر میں داخل ہوا اور بیوی کی بات سن کر حیران ہوا کہ بھابھی تو کہتی تھی یہ خود ہی انہیں رکھنا نہیں چاہتی تھی مگر یہ تو گلے کر رہی ہے۔ والد کو دیکھ کر آہستہ سے سلام کیا اور ناراض شکل بنا کر اندر اپنے کمرے میں چلا گیا۔ باپ ہلکا سا مسکرایا۔ بیوی امان کے پیچھے آئی اور سمجھانے لگی۔ امان باپ سے بہت پیار کرتا تھا اور انہیں دیکھ کر اندر خوشی بھی ہو رہی تھی۔ پھر باپ خود کھانس کر اندر آ گیا اور پاس بیٹھ گیا۔ پھر امان کے کندھے پر ہاتھ رکھ کر بولا

میں نے یہ سب ڈرامہ کیا تھا اگر نہ کرتا تو تم ہم سب کو جو اس نئے گھر میں لے جانے کا جو تہیہ کیے بیٹھے تھے کبھی نہ ٹلتے۔ سب کو یہاں لانے میں عقلمندی نہیں ہے حالانکہ اس میں ابرار کا فائدہ ہے کہ اسے یہ آبائی گھر مل رہا ہے اور دوسرے تم اسے سست بنانا چاہتے ہو۔ ابھی وہ گھر میں خرچے کا ایک آنہ نہیں دیتا۔ اس پر ذمہ داری تب پڑے گی جب ہم نہ رہیں گے۔

امان نے یک دم اٹھ کر باپ کے منہ پر ہاتھ رکھ دیا۔ باپ نے مسکراتے ہوئے کہا 

بیٹا یہ قدرت کا قانون ہے کہ والدین سدا ساتھ نہیں رہتے۔ بچوں کو جدا ہونا پڑتا ہے۔ بیٹی کو پرائے گھر اور بیٹے کو روزگار کے سلسلے میں دور جانا پڑتا ہے۔ میں صرف تمہاری ماں کی وجہ سے ادھر آیا ہوں۔ تمہاری بیوی بہت اچھی ہے۔ اس کی قدر کرو اور اس کے ساتھ اچھا برتاؤ کرو۔ اگر اچھا نہیں کر سکتے تو کم از کم برا بھی نہ کرو۔ ایک دن تمہیں اس کی قدر ضرور آئے گی۔ اچھی بیوی خدا کی نعمت ہوتی ہے۔ 

پھر وہ اٹھ کر کھڑکی کے پاس کھڑے ہو گئے اور دوبارہ گویا ہوئے 

تم ابھی تک ابرار کی بیوی کو پہچان نہیں پائے ہو۔ اپنی آنکھیں کھولو۔ اب تم جاؤ ماں سے ملو اور اسے بےشک گھر بھی لاؤ مگر وہ رات کو اپنے گھر ہی سوئے گی۔  

امان نے روہانسہ ہوکر کہا

کیوں بابا۔ 

اس کے والد ایک توقف کے بعد بولے

 بیٹا اس میں سب کی بھلائی ہے۔ وہ تم سے بھی بہت پیار کرتی ہے مگر جو بچے ذرا پیچھے رہ جاتے ہیں، ماں باپ دونوں اس سے زیادہ پیار کرتے ہیں۔ ماں کو غلط نہ سمجھنا اور کسی کی باتوں میں آکر اپنا گھر خراب نہ کرنا۔ گھر میں اچھا ماحول رکھو۔ چند دنوں کی یہ زندگی انسان کو خوش رہ کر گزارنی چاہیے۔ لڑنے جھگڑنے سے انسان خود ہی بے سکون رہنا ہے۔ اپنی بیوی سے ہنسنا بولنا، اس کی دلجوئی کرنا صدقہ ہے اور نفل نمازوں کا ثواب ملتا ہے۔

امان کے والد کے آنے سے وہاں سب کا آنے جانے کا راستہ کھل گیا۔ امان ادھر آیا اور ابرار اس کو مبارک دینے گیا۔ بھابھی نعیمہ نے ان کو نئے گھر کا بڑا تحفہ بھی دیا۔ امان بہت خوش ہوا مگر اس کا والد سمجھتا تھا کہ بہو ایک کے سو وصول کرے گی۔ وہ موقع سے فائدہ اٹھانا جانتی ہے۔ اس نے امان کے گھر بہت زیادہ جانے سے روکا جس کا امان کی بیوی نے دل میں بہت شکر ادا کیا کیونکہ اسے بھابھی نعیمہ کی قہر بھری آنکھوں سے الجھن ہوتی تھی۔ اس کا پیر بھی بھاری تھا اور اسے اب کی بار بچے کے زندہ رہ جانے پر بہت ڈر تھا۔